ಬಳ್ಕುಂಜೆ ಸಾಂ ಪಾವ್ಲ್ ಫಿರ್ಗಜೆಂತ್ ಜನವರಿ 13 ಆನಿ 14 ವೆರ್ ಗೊವ್ಳಿಕ್ ಭೆಟ್  ಮಾಂಡುನ್ ಹಾಡ್ ಲ್ಲಿ. . ಜನವರಿ 13 ವೆರ್ ಸಾಂಜೆರ್ 3:30 ವರಾರ್ ಮಂಗ್ಳುರ್ಚೆ ಗೊವ್ಳಿ ಬಾಪ್ ಅಧಿಕ್ ಮಾನಾದಿಕ್ ದೊತೊರ್ ಪೀಟರ್ ಪಾವ್ಲ್ ಸಲ್ಡಾನ್ನಾ ಹಾಂಕಾ ಇಗರ್ಜಿಚಾ ದ್ವಾರಲಾಗಿಂ ಬೆಂಡಾಚಾ ನಾದಾನ್ ಸಂಭ್ರಮಾನ್ ಸ್ವಾಗತ್ ಕೆಲೊ. ಫಿರ್ಗಜ್ ವಿಗಾರ್ ಮಾ ಬಾ.ಪಾವ್ಲ್ ಸಿಕ್ವೇರ ಹಾಣಿಂ ಪುಲಾಂ ಝೆಲೊ ಅರ್ಪುನ್ ಯೆವ್ಕಾರ್ ಮಾಗ್ಲೊ. ಕೊವೆಂತಾಚಿ ವ್ಹಡಿಲ್ನ್ ಸಿ. ಪ್ರಮೀಳ, ಫಿರ್ಗಜ್ ಉಪಾಧ್ಯಕ್ಷ್ ಡಾ. ಫ್ರೀಡಾ ರೊಡ್ರಿಗಸ್, ಕಾರ್ಯದರ್ಶಿ ಶ್ರೀಮತಿ ನ್ಯಾನ್ಸಿ ಕಾರ್ಡೋಜ,  ಸಂಯೋಜಕ್ ಶ್ರೀಮತಿ ಲವೀನ ಸೆರಾವೊ ಹಾಣಿಂ ಪುಲಾಂ ತುರೆ ಅರ್ಪುನ್ ಗೊವ್ಳಿ ಬಾಪಾಂಕ್ ಸ್ವಾಗತ್ ಕೆಲೊ. 

ಸುರ್ವಿಲಿ ರೀತ್ ಸಂಪ್ತಚ್  4:00 ಥಾವ್ನ್ 4:45 ಪರ್ಯಾಂತ್ ಗೊವ್ಳಿ ಬಾಪಾಂನಿ ಕ್ರಿಜ್ಮಾಚಾ ಭುರ್ಗ್ಯಾಂಕ್ ದೊತೊರ್ನ್ ಕೆಲಿ. ಉಪ್ರಾಂತ್ 4:45 ಕ್ ಮಿಸಾಚೆಂ ಬಲಿದಾನ್ ಪ್ರಾರಂಭ್ ಜಾಲೆಂ. ಮಿಸಾರ್ ಗೊವ್ಳಿ ಬಾಪಾಂನಿ ಫಿರ್ಗಜೆಚಾ 34 ಭುರ್ಗ್ಯಾಂಕ್ ಥಿರಾವ್ಣೆಚೊ ಸಾಕ್ರಾಮೆಂತ್ ದಿಲೊ. ಮಿಸಾ  ಉಪ್ರಾಂತ್ ಸಿಮಿಸ್ತ್ರಿಚಿ ಭೆಟ್ ಕೆಲಿ. ಸಾಂಜೆರ್ 6:30 ಕ್ ಫಿರ್ಗಜೆಚಾ ಅರ್ಥಿಕ್ ಪರಿಷದೆ ಸವೆಂ ಜಮಾತ್ ಚಲಯ್ಲಿ. 7:00 ವರಾರ್ ಫಿರ್ಗಜ್ ಗೊವ್ಳಿಕ್ ಪರಿಷದೆ ಸವೆಂ ಜಮಾತ್ ಕೆಲಿ ಆನಿ ಸಾಂದ್ಯಾ ಸವೆಂ ಜೆವಾಣ್ ಸ್ವೀಕಾರ್ ಕೆಲೆಂ.

ಜನವರಿ 14 ಆಯ್ತಾರ ಸಕಾಳಿಂ 8:15 ಕ್ ಗೊವ್ಳಿ ಬಾಪಾಂನಿ ವ್ಹಡಾಂಕ್ ತಶೆಂ ಭುರ್ಗ್ಯಾಂಕ್ ದೊತೊರ್ನ್ ಆನಿ ಶಿಕೊವ್ಣ್ ದಿಲಿ. 9:00 ವರಾರ್ ಮಿಸಾಚೆಂ ಬಲಿದಾನ್ ಭೆಟಯ್ಲೆಂ.  ಉಪ್ರಾಂತ್ 11:00 ವರಾರ್ ಫಿರ್ಗಜೆಚಾ ಆಯೋಗಾಂ ಸವೆಂ ಆನಿ ಸಂಘ್ ಸಂಸ್ಥ್ಯಾ ಸವೆಂ ಗೊವ್ಳಿ ಬಾಪಾಂನಿ ಜಮಾತ್ ಚಲಯ್ಲಿ ಆನಿ ಗರ್ಜೆಚಿಂ ಸಲಹಾ ಸೂಚನಾ ದಿಲಿಂ.  ತಾಚೆ ಉಪ್ರಾಂತ್ ಕೊವೆಂತಾಚಿ ಭೆಟ್ ಕೆಲಿ. ಸಾಂಜೆರ್ 3:30 ವರಾರ್ ಪಿಡೆಸ್ತಾಂಚಿ ಭೆಟ್ ಕೆಲಿ ಉಪ್ರಾಂತ್ 4:00 ವರಾರ್ ಸಾಂ ಪಾವ್ಲ್ ವಾಡ್ಯಾಚ್ಯಾ ವಾಡ್ಯಾ ಜಮಾತಿಂತ ಭಾಗ್ ಘೆತ್ಲೊ. ಉಪ್ರಾಂತ್ 6:15 ವರಾರ್ ಗೊವ್ಳಿ ಬಾಪಾಂನಿ ಮಾಗ್ಣ್ಯಾ ಸವೆಂ ನಿರ್ಗಮನ್ ಘೆತ್ಲೊ. 

ದೋನ್ ದಿಸಾಂಚಿ ಹಿ ಗೊವ್ಳಿಕ್ ಭೆಟ್ ಫಿರ್ಗಜ್ ವಿಗಾರ್ ಮಾ.ಬಾ.ಪಾವ್ಲ್ ಸಿಕ್ವೇರ ಹಾಂಚಾ ಮಾರ್ಗದರ್ಶನಾರ್ ಆನಿ  ಕಾರ್ಯಕಾರಿ ಸಮಿತಿ , ಗೊವ್ಳಿಕ್ ಪರಿಷದ್ ಆನಿ ಸರ್ವ್ ಫಿರ್ಗಜ್ಗಾರಾಂಚಾ ಸಹಕಾರಾನ್ ಯಶಸ್ವಿ ಜಾಲಿ.